روتيني اليومي بعد دخول أي صفقة في الفوركس: كيف أتعامل مع السوق بدون خوف أو توتر؟
في المقال دا حابب أشارك معاكم روتيني الكامل بعد دخول أي صفقة، خصوصًا بعد آخر توصية تعليمية نزلناها.
الروتين دا جزء أساسي من نجاح أي متداول محترف… واللي يلتزم بيه هيفرق معاه حرفيًا في كل صفقة.
أولًا: قبل ما أدخل أي صفقة
أنا عمري ما بدخل صفقة لمجرد إنها “شكلها حلو”.
فيه خطوات واضحة لازم أراجـــعها:
- تحديد الاتجاه العام (Trend)
- تحديد مناطق السيولة
- التأكد إن الفرصة فعلًا تستاهل الدخول
- التأكد إن مفيش أخبار قوية
- تحديد حجم المخاطرة قبل أي دخول
بعدها… لو كل حاجة ماشية تمام، بدخل الصفقة بدون أي تردد.
ثانيًا: ليه مش بتردد بعد الدخول؟
لما تكون مقتنع بطريقتك نتيجة:
✔ باك تست
✔ تجربة ديمو
✔ تداول حقيقي
ساعتها بتبقى واثق ومش بتخاف…
عكس اللي بياخد توصيات أو بيشتغل بطريقة هو مش مصدّقها.
ثالثًا: كل صفقة ممكن تكسب… وممكن تخسر
مفيش حاجة اسمها “صفقة مضمونة”.
السوق ليه مزاجه، ومفيش محلل يقدر يغيّره.
عشان كدا أنا ثابت على مخاطرة قليلة جدًا:
- 1% لو الصفقة مع الاتجاه
- 0.5% لو الصفقة عكس الاتجاه
لأن حتى أقوى الطرق فيها خسائر طبيعية…
وإدارة رأس المال أهم من التحليل نفسه.
رابعًا: بعد الدخول… بقفل الشارت تمامًا
بحط الهدف + الاستوب…
وبقفل الشارت.
ليه؟
لأن مراقبة الصفقة المستمرة تعمل:
- توتر
- تردد
- شيل استوب
- تعزيز غلط
- أكشن عاطفي
ودي مصيبة لأي متداول.
لكن طبعًا برجع أبص كل فترة بشكل منظم…
مش قافل اليوم كله.
خامسًا: بشغل نفسي بحاجات مفيدة
بعد قفل الصفقة بروح:
- أرد على العملاء
- أنزل تحليلات
- أكتب مقالات
- أكمل برمجة
- أدرس كورسات
- أو حتى أتفرّج على فيلم أو مسلسل… أو ألعب فيديو جيمز شوية وأريح دماغي
المهم… أبعد عن الصفقة 100%.
سادسًا: بعد ما الصفقة تقفل
برجع أشوف:
- هل الدخول كان مثالي؟
- لو في خطأ… أكتب سببه
- لو صح… باخد Screenshot
- وبسجّل كل دا في دفتر التداول (Journal)
العادة دي بتطور المتداول أسرع من أي كورس.
سابعًا: الالتزام هو مفتاح النجاح
أنا ملتزم يوميًا أشتغل من 10 صباحًا حتى 7 مساءً…
بعدها راحة.
النجاح في الفوركس مش سحر…
هو عبارة عن:
طريقة + التزام + إدارة رأس مال + أعصاب هادية.
